رسالة من أم من الصعيد لولدها المسافر لبر مصر...!!!!
********************************************
خلاص نويت ع السفر يا ولدى ..يا حتة من جلبى ..وياحتة من كبدى..
طبعا أكل العيش ياأأأامايا ..روح يا ولدى جلبى وربى .......راضين عليك
بس لما تدلا البلد الى فيها شغلك ..حاسب يا ولدى.... من شريط السكة حديد (اللى ام نسميه حدنا الوابور)
أوعى الوابور يدهسك ياولدى(اسم الله عليك..) خطى.... خطوة خطوة ..
أوعاك يا ولدى... من بنات البندر..ومن حديتهم الحلو ...وضحكتهم النورة .
اوعاك ياولدى تنزل النيل... تتسبح فيه لا الجنية تاخدك منى... .والنيل وسيع ماله جرار..
وأوعاك من وكل البلاد دى ..باعتة معاك بلاص المش ..ورغفان البتاو ..والفايش..والفطير ..ودكرين البح المزججين(المزغطين )زين..
تاكل زين اوعاك تسهى على نفسك ..وفى الليل والجمارية طالعة ..طل عليها وجول
أزيك ياأمه وحشتينى ووحشنى حضنك الدافى..وكوباية الشاى الموهوجة بدخان الكانون ..
من ايديك الحلوة .واللمة ياأمايا ..وضحكتك الحلوة جصاد غلب الايام وجساوتها ..
وابجا أسال عن حبات الجلب خياتك ايش عاملين والولد خوانك والاهل والجيرة..أوعى بر مصر ينسيك ناسك واهلك ..
اوعاك تنسى تقراء الفاتحة للمرحوم عمك نسيبك ابو نعمات ..اللى جرينا فاتحتك عليها ..
بوك يا حبة الجلب من آذان الفجر ..اندله البندر ..راح يطل.... على حسنين ابو عمر ..
فى المشفشفة هنيت البندر ..ابو الاصول من يومه .وكل ما اطل فى وشه ..اشوف وشك الغالى..
نسيت يا ولدى اول ماتندله بكان وكل عيشك... تراعى الحلال وبعد(وأبعد)عن الحرام ..وتبعتلى مكتوب تجولى ..وصلت بالسلامة يمه ..مستنى .دعاكى ..بأدعيلك ياولدى فى الفجرية والنسمة هالة طرية ..
روح ياولدى ...ربنا يكفيك السوء .ورفجاء السوء ..وخفف من السداير (السجاير) هبابه
صحتك بالدنيا ..واللى راح ما بيرجع من الصحة.
امك وخواتك وخياتك بيسلموا عليك .والجيران وكل الحبايب يا حبة الجلب .
متوحشينك .وبيهدوك السلام..ومن أمك السلام ..
ابجى أكتب العلوان ع الظرف:أمى الحجة نبويةبت أبو الكرم..
نجع الفلايح عزبة الرضوانى .جنب دكان الحاج ابو عسكر ..
باكورة كتابتى للزجل بالهجة الصعيدى لعلى أجد منكم القبول والتشجيع..
الثلاثاء يوليو 02, 2013 11:37 pm
